රට තුළ ඩොලර් හිඟයක් නොමැති බව ත් ආනයනයන් ඇතුළු කාර්යයන් සඳහා අවශ්‍ය ඩොලර් තිබෙන බව ත් මහ බැංකු අධිපති අජිත් නිවාඩ් කබ්රාල් පවසනවා. මහ බැංකු අධිපතිවරයා එලෙස පැවැසුවේ, ඊයේ (පෙබ. 8 ) ශ්‍රී ලංකා මහ බැංකුවේ පැවති වැඩසටහනකදී යි.
ඩොලර් හිඟයක් තිබේ නම්, පසුගිය වසර තුළ අමෙරිකානු ඩොලර් බිලියන 22ක භාණ්ඩ ද, පසුගිය මාසයේදී අමෙරිකානු ඩොලර් බිලියන 2ක භාණ්ඩ ද මෙරටට ආනයනය කළේ කෙසේදැයි මහ බැංකු අධිපතිවරයාගෙන් මාද්‍යවේදියකු ප්‍රශ්න කළා.
”ඩොලර් හිඟයක් ඇති වෙලා තියෙන්නේ , ඩොලර් නොමැතිකම නිසා නෙමෙයි ඩොලර් සඳහා අධික ඉල්ලුමක් පැවතීම නිසා, ඒ සඳහා කළ යුත්තේ ඩොලර් උපයා ගැනීම සඳහා විකල්ප මාර්ග සහ ක්‍රමවේද සොයා ගැනීම.” බව අජිත් නිවාඩ් කබ්රාල් මහතා කියා සිටියා.
ඩොලර් සඳහා ඉල්ලුමක් පැවතීම නරක දෙයක් නොවන බව ද සිදු කළ යුත්තේ පරිභෝජනය අඩු කිරීම නොව ඩොලර් උපයන විකල්ප මාර්ග සකසා ගැනීම බව ද මහා බැංකු අධිපතිවරයා වැඩිදුරටත් ප්‍රකාශ කළා.
