ශ්‍රී ලංකාව වසර 30කට පසු ඔස්ට්‍රේලියාවට එරෙහිව එක්දින තරගාවලියක් මෙරටදී ජය ගැනීමට ඊයේ (21) සමත් වුණා.
ඒ ඊයේ (21) පැවති සිව්වන එක්දින තරගය ලකුණු 4කින් ජය ගැනීමත් සමගිනුයි.
මීට පෙර ශ්‍රී ලංකාව මෙරටදී ඔස්ට්‍රේලියාවට එරෙහිව එක්දින තරගාවලියක් ජයගෙන තිබෙන්නේ 1992 වසරේදී යි.
කොළඹ ආර්. ප්‍රේමදාස ක්‍රීඩාංගණයේදී පැවති තරගයේ ප්‍රථමයෙන් පන්දුවට පහර දුන් ශ්‍රී ලංකාව පන්දුවාර 49කදී සියලු දෙනා දැවී ලකුණු 258ක් ලබා ගැනීමට සමත් වුණා.
එහිදී චරිත් අසලංක ලකුණු 110ක් ලබා ගැනීමට සමත් වුණා.
පිළිතුරු ඉනිම ක්‍රීඩා කළ ඔස්ට්‍රේලියා කණ්ඩායමට නියමිත පන්දුවාර 50 අවසානයේදී සියලු දෙනා දැවී ලබාගත හැකි වූයේ ලකුණු 254ක් පමණි.
ඩේවිඩ් වෝර්නර් දැවී ගියේ ලකුණු 99කට යි.
ඒ අනුව තරග 5කින් සමන්විත එක් තරගාවලිය තරග 3-1ක් ලෙස ජයගෙන ශ්‍රී ලංකාව ඉදිරියෙන් සිටිනවා.
දෙරට අතර මීළඟ තරගය ලබන 24වැනිදා පැවැත්වීමට නියමිතව තිබෙනවා.
