නිති හෝ රෙගුලාසි පැනවීම මඟින් වෙළඳපොල කටයුතු පාලනය කළ නොහැකි බව නව මහ බැංකු අධිපති ආචාර්ය නන්දලාල් වීරසිංහ පවසනවා.

මිල පාලනය සඳහා ගැසට් නිවේදන විශාල ප්‍රමාණයක් නිකුත් කළද ඉන් ප්‍රතිඵලයක් අත්නොවීමෙන් එය පැහැදිලි වන බවයි මහ බැංකු අධිපතිවරයා පෙන්වා දුන්නා.

“ආර්ථික අර්බුදයේ හදිසි අවස්ථාව” මැයෙන් ශ්‍රී ලංකා විද්‍යුත් විකාශකයින්ගේ සංසඳය සංවිධාන කළ, සාකච්ඡාවට එක් වෙමින් මහ බැංකු අධිපතිවරයා මේ බව කියා සිටියා.

ආණ්ඩුවයි විපක්ෂයයි එකතුවී නාටකයක් රඟපාන බව අගරදගුරු මැල්කම් කාදිනල් රංජිත් හිමියන් පවසනවා.මීගමුව නගර මධ්‍යයේ අද (09) පැවති උද්ඝෝෂණයකට එක්වෙමින් කාදිනල් හිමියන් මේ බව සඳහන් කළා.

“දැන් අද පාර්ලිමේන්තුවේ ආණ්ඩු පක්ෂයත් විරුද්ධ පක්ෂයත් දෙගොල්ලෝම එකතුවෙලා නාටකයක් රඟපානවා වගේ අපිට පෙනවා. ඒ නාට්‍ය රඟපාලා අපිව මෝඩයන් හැටියට සලකලා.. අපිට ඒ තත්ත්වයෙන් මේ කරන ක්‍රමවේදය පිළිගන්නැයි කියන එක වැරදියි.

අපි එහෙම භාරගන්න කැමති නෑ. අද අපිට අවශ්‍යයි රටට ලොකු වෙනසක්. නව ආරම්භයක්. දැන් අපේ විදේශ ඇමතිතුමා අපේ මුදල් ඇමතිතුමා යන්න ඕනේ IMF එකට ණය ඉල්ලන්න.”

රටවල්වලට ගිහිල්ලා අතදිගු කරන්න ඕනේ.. හිඟා කන්න. ඊයේ මං පත්තරේ දැක්කා ඉන්දියාවේ හිඟන්නෙක්.. එයා එකතු කරපු සල්ලි වගයක් ලංකාවට දෙනවා කියලා. ඒ කියන්නේ අපි හිඟන්නන්ගේ තත්ත්වයටත් එහා යන තත්ත්වයකට වැටුණයි කියන එකයි.

මේ තත්ත්වය දිගටම කරගෙන යන්න දෙන්න බෑ. අපි ඉල්ලා සිටිනවා මේ රටේ සෑම පුරවැසියෙක්ගෙන්ම මේ ක්‍රමය වෙනස් කරන්න එකතු වෙන්න.. ඔක්කොමත් එක්කම. එකතුවෙලා මේ අයට කියන්න කරුණාකරලා.. යන්න දැන් ඇති රට කෑවා.. යන්න කියලා.

ගිහිල්ලා.. මේක කරන්න පුලුවන් කෙනෙක්ට රට භාර දෙන්න. තවදුරටත් මේ අරගලය ලංකාව පුරාම කරගෙන ගිහිල්ලා සියලුමදෙනා පාරට බැහැලා.. මේ දූෂිත ක්‍රමවේදය ඉවත් කරන්නට කටයුතු කරන්න ධෛර්යවන්තව.”ලෙස කාදිනල් හිමියන් කියා සිටිනවා.

ධාවන ශූරයෙකු වන සුගත් තිලකරත්නට ආණ්ඩුවේ මැර පිරිසක් විසින් තර්ජනය කර තිබෙනවා.

අද (9) සුගත් තිලකරත්න තම රාජකාරිය සදහා යන අවස්ථාවේ කොලොන්නාව තෙල් සංස්ථා පරිශ්‍රයේදී අදාළ සිදුවීම සිදුවී ඇති අතර එහිදී ඔහුට බැනවැදී මැර තර්ජන එල්ලකර තිබෙනවා.

ඔවුන් පවසා ඇත්තේ ආණ්ඩුව අමාරුවෙන් නැගිටීමට උත්සහ දරන අවස්ථාවේ ආණ්ඩුවට එරෙහිව සුගත් තිලකරත්න තම මතය පළකර කටයුතු කිරීම නිසා ඒ පිළිබඳ ඔහුට ඉදිරියේදී වන්දි ගෙවීමට සිදුවන බවයි.

දෙමටගොඩ පිහිටි ඛනිජ තෙල් සංස්ථාවේ ප්‍රධාන කාර්යාලය ට්‍රක් රථ රියදුරන් පිරිසක් විසින් වටලා ඇති බව වාර්තා වනවා.

ඔවුන්, රැගෙන ආ ට්‍රක් රථ කිහිපයක් හරස් කර ප්‍රධාන කාර්යාලය ඇතුළු වන දොරටු සම්පූර්ණයෙන් ම අවහිර කර ඇති අතර, මේ හේතුවෙන් ප්‍රධාන කාර්‍යාල භූමියට ඇතුළු වීමට හෝ ඉන් පිටවීමට කිසිවකුට හෝ හැකියාවක් නො මැති බව යි වාර්තා වන්නේ.

ස්ථානයේ තරමක කලබලකාරී තත්ත්වයක් වාර්තා වන අතර, පොලිස් නිලධාරින් පිරිසක් ද තත්ත්වය පාලනය කිරීම සඳහා යොදවා ඇති බව සදහන් වනවා.

හිටපු මහබැංකු අධිපති අජිත් නිවාඩ් කබ්රාල් හට විදෙස්ගතවීම තහනම් කරමින් කොළඹ මහේස්ත්‍රාත් අධිකරණය විසින් අද (07) නියෝගයක් නිකුත් කර තිබෙනවා.

හිටපු මහ බැංකු අධිපතිවරයාට ලබන 18 වැනිදා අධිකරණයේ පෙනී සිටින ලෙස දන්වමින් සිතාසි ද නිකුත් කර තිබෙනවා.

කොළඹ අතිරේක මහේස්ත්‍රාත් හර්ෂණ කැකුණවෙල එම නියෝගය නිකුත් කළේ හිටපු ආණ්ඩුකාර කීර්ති තෙන්නකෝන් විසින් පෞද්ගලික කරන ලද පැමිණිල්ලක් සලකා බැලීමෙන් අනතුරුවයි.

මහබැංකු අධිපතිවරයාව සිටියදී මහජන මුදල් අවභාවිත කළේ යැයි චෝදනා කරමින් මෙම පැමිණිල්ල ඉදිරිපත් කර තිබෙනවා.

ජනාධිපති නීතිඥ මෛත්‍රී ගුණරත්න හා නීතිඥ ගුණරත්න වන්නිනායක යන මහත්වරුන් ඇතුළු නීතිඥයින් පිරිසක් පැමිණිල්ල වෙනුවෙන් අධිකරණයේ කරුණු දැක්වීය.

බෙල්ල ගහලා ගියොත් තැල්ල බඳින්න බැරි බව හිටපු මුදල් අමාත්‍ය අලී සබ්රි පවසනවා. ඒ අනුව රට තුළ ඇතිව තියෙන තත්ත්වයට තමා ජනතාවගෙන් සමාව ඉල්ලන බව ද හිටපු මුදල් අමාත්‍ය වරයා කියා සිටියා. අද (07) දින පාර්ලිමේන්තු විවාදයට එක්වෙමින් මෙම අදහස් පළ කළා.

නිවෙස් තුළ විදුලිය, ගෑස්, ඉන්ධන නොමැති විට එම පීඩනය ජනතාව පිටකිරීම ඉතා සාධාරණ බව ද හිටපු මුදල් අමාත්‍ය වරයා වැඩිදුරටත් කියා සිටියා

”මිනිස්සුන්ට ප්‍රචණ්ඩකාරීත්වයෙන් තොරව, සාමකාමීව විරුද්ධත්වය ප්‍රකාශ කිරීම අයිතියක්. අයිතියක් විතරක් නෙමෙයි. ඒක යුතුකමක්. ඒක අපි පිළිගන්නවා. හැබැයි ඒක ප්‍රචණඩත්වය කරා යනවා නම් අපිට ඒක කිසිසේත්ම සාධාරණීකරණය කරන්න බැහැ. පාර්ලිමේන්තුවේ සිටින රොෂාන් රණසිංහගේ, කෙහෙළිය රඹුක්වැල්ලගේ, කාංචනගේ ඇතුළු මිනිස්සුන්ගේ ගෙවල් වටකරලා ගල් ගහලා මොකද්ද බලාපොරොත්තු වෙන්නේ ? ඒක පිටිපස්සේ කවුද ඉන්නේ.

මේ තත්ත්වය තේරුම් ගන්න. මට මතකයි ඒ කාලේ අලෙවි මව්ලානා මහත්මයා කියනවා, “තැල්ල බඳින්නත් බෙල්ල තියෙන්න ඕනේ කියලා” බෙල්ල ගහලා ගියොත් තැල්ල බඳින්න බෑ. ඒක නිසා ඔබතුමන්ලා මේ ආර්ථිකය හදන්නත් මේ රට ආරක්ෂා කරගන්න. ඒ නිසා මම නැවත වතාවක් ආරාධනා කරනවා අන්තර් පාලනයකට සම්බන්ධ වෙන්න. ඔබතුමන්ලා සතු විශේෂඥ දැනුම රට වනුවෙන් ආයෝජනය කරන්න.

අද ඔයගොල්ලෝම ඇවිත් හිටගෙන කියනවා ව්‍යවස්ථාවෙන් එළියට ගිහින් විසඳුම් හොයන්න කියලා. අද ඕක කියයි. ඉස්සරහට ඕකෙන් වෙන බලපෑම කල්පනා කරලා බලන්නට ඕනේ. කිසිම මිනිහෙක්ට මේ රටේ ආණ්ඩුවක් කරන්න වෙන්නේ නෑ. අවුරුද්දෙන් අවුරුද්දට මිනිස්සු පාරට ගහයි. මොකද අපි අමාරුම කාලෙක ඉන්නේ. කවුරු ආවාත්, ශක්‍ර දෙයියෝ ආවත්, අපිට වෙනවා විශාල පරිත්‍යාගයක් කරන්න වෙනවා. අපි එකිනෙකාට ඇඟිල්ල දික්කරලා මේකෙන් එළියට එන්න බෑ.

අපේ හර්ෂ මැතිතුමාට අපි ආරාධනා කරනවා මේක ඇවිත් භාරගන්න කියලා. අපි දෙන්නම් ඔබතුමාට ඇවිල්ලා ඔයතුමා කරන්න. අපි උදව් කරන්නම්. ගරු හර්ෂ මැතිතුමනි, ඔබතුමා දන්නවා ඔයතුමන්ලාට හිටිය හොඳම බොස් තමා මංගල සමරවීර මහත්තයා කියලා. මංගල සමරවීර ආර්ථික විද්‍යාඥයෙක් නෙමෙයි. එතුමා හොඳ මුදල් ඇමති කෙනෙක් කියලා ඔබතුමා කියනවා. එරාන් වික්‍රමරත්නත් කියනවා. මම හිතන්නේ ආර්ථික විද්‍යාඥයෙක් වෙන්න ඕනේ නෑ හොඳ මුදල් අමාත්‍යවරයෙක් වෙන්න. හොඳට ඇහුම්කන්න දෙන්න ඕනේ, හොඳට තීරණ ගන්න පුළුවන් වෙන්න ඕනේ. අපි මේ ප්‍රශ්නේ බරපතළකම තේරුම් අරන් තියෙනවා. ඔබතුමන්ලාට අපිත් එක්ක එකතුවෙලා විසඳුම් හොයන්න කියලා ආරාධනා කරලා තියෙනවා.”ලෙස හිටපු මුදල් අමාත්‍ය වරයා කියා සිටියා”

කව්රුහරි හිතනවානම් ජීවත් ආරක්ෂා වෙන්න ස්වාධීන වෙන්න ඕනේ කියලා වඩාත් හොඳම දේ හැටියට හිටපු රාජ්‍ය අමාත්‍ය කාංචන විජේසේකර මන්ත්‍රීවරයා කියන්නේ එම අය පාර්ලිමේන්තු මන්ත්‍රී ධුරයෙන් ඉල්ලා අස්විය යුතු බවයි. මන්ත්‍රීවරයා අද (07) පාර්ලිමේන්තුවේදී මේ බව පැවසුවා.

“දේශපාලනය කරනවානම් අපි බය වෙන්න හොඳ නැහැ. මේ තියෙන අභියෝග වලට අපි මුහුණ දෙන්න ඕනේ.

අපි පැහැදිලිව කියනවා, අපේ පාක්ෂිකයන්ටත් අපි කියනවා, ජනතාවටත් කියනවා අවශ්‍ය විසඳුම් ලබා දෙන්න කටයුතු කරනවා වගේම නොබියව, විශේෂයෙන්ම ගෝඨාභය රාජපක්ෂ ජනාධිපතිතුමා ඉල්ලා අස්වෙන්නේ නැහැ. ඉල්ලා අස්වෙන්න අපි ඉඩ තියෙන්නෙත් නැහැ. අග්‍රාමාත්‍යවරයාත් තව දුරටත් මේ ධුර කාලයේ ඉන්නවා”යි විජේසේකර මන්ත්‍රීවරයා කියනවා.