තොටළඟ ගින්නෙන් 220ක් අවතැන්

තොටළඟ කජීමා වත්තේ නිවාස පේළියක ඊයේ (27) රාත්‍රී 7.30ට පමණ හට ගත් ගින්නක් හේතුවෙන් එහි නිවාස 80කට වැඩි ප්‍රමාණයක් ගිනි ගැනීමට ලක්ව ඇති බවයි කියන්නේ. එහි පදිංචි පවුල් වල සාමාජිකයන් 220ක් සම්පුර්ණයෙන්ම අනාථ වී ඇති බව වාර්තා වෙනවා.

ගින්න මැඬලීමට ගිනි නිවන රථ 13ක් පමණ යෙදවූ බව කොළඹ නගර සභාවේ ගිනි නිවන ඒකකයේ ප්‍රධානි පී.ඩී.කේ.ඒ. විල්සන් කියා සිටියා. ගිනි නිවන භටයන් 50කට වැඩි පිරිසක් සමඟ ප්‍රදේශවාසීන් ගින්න මැඬපැවැත්වීමට දැඩි පරිශ්‍රමයක් දරා තිබිණත් නිවාස 80ක් පමණ සම්පූර්ණයෙන් ගිනිබත් වෙනතුරු ගින්න මැඩලීමට නොහැකිව තිබෙනවා.

පැය දෙකක පමණ මෙහෙයුමකින් පමණ ගින්න මැඬපවත්වාලීමට ගිනි නිවන හමුදාව සමත් වන විට ලෑලිවලින් ආවරණය කර වහළට තහඩු සෙවිළි කර ඇති නිවාස විනාශ වූ බව ප්‍රදේශවාසීන් පවසනවා. මෙහි වැඩි පිරිසක් පදංචිව සිටින්නේ නාගරික සංවර්ධන අධිකාරියෙන් ඉදි කරනු ලබන තට්ටු නිවාසවලට යෑමේ අපේක්ෂාවෙන් සිටින පිරිස් බවයි වාර්තා වන්නේ.

ගින්න ව්‍යාප්ත වීමත් සමඟම එම නිවාසවල පදිංචි පිරිස් ඔවුන්ට බේරා ගැනීමට හැකි දේපළ නිවාසවලින් පිටතට ගෙන තිබෙන බව පොලීසිය පවසනවා. එහෙත් වැඩි දෙනකුගේ දේපළ ගින්නෙන් විනාශ වී ඇති අතර ඇඳිවත පමණක් ඉතිරි වූ පිරිස වැඩි බව පදිංචිකරුවන් කියනවා.

ගින්නට හේතුව මේ වන විටත් අනාවරණය වී නැති අතර ඒ සම්බන්ධයෙන් විමර්ශන පැවැත්වෙන බව පොලිසිය පවසනවා.

ගින්නට මැදි වී සියල්ල අහිමි වූ බොහෝ දෙනෙකු සඳහන් කරනු ලැබුවේ තමන් පදිංචිව සිටි ස්ථිර නිවාස කඩා දමා එම ස්ථානයේ තට්ටු නිවාස ඉදි කර දෙන බව සඳහන් කරමින් මාස 6ක පමණ කාලයකට යැයි කියා තමන්ව මේ තාවකාලිකව ඉදි කළ නිවාසවල පදිංචි කරවූ බවයි. එහෙත් දැන් අවුරුදු 10ක් ගෙවී ගොස් ඇතත් තාමත්, මේ තාවකාලික පැල්පත්වල අවම පහසුකම් යටතේ ජීවත් වන බව එම පිරිස් සඳහන් කරනවා. මේ තාවකාලික නිවාස සංකීර්ණය තුළ පාසල් දරුවන් රැසක් සිටින අතර ඔවුන්ගේ පොත්පත්ද මුළුමනින්ම ගින්නෙන් විනාශ වී ගොස් තිබෙනවා.

පොලිසිය පවසන්නේ 2021 වසරේ මාර්තු 15 වැනිදා අලුයම් කාලයේදී ද මේ ආකාරයේම ගින්නක් මේ නිවාස සංකීර්ණය තුළ හටගත් බවයි. එහිදී නිවාස 27ක් ගිනිගෙන විනාශ වී තිබුණා. පසුව පසුගිය මාර්තු 24 වැනිදා ද මැදියම් කාලයේ මේ නිවාස යලිත් ගිනි ගත්තා. එම ගින්නෙන් නිවාස 21ක් ගිනිගෙන විනාශ වී තිබෙනවා.

POPULAR

Recent articles